logo_geo
eng_logo
ქუთაისის ოპერის თეატრი ქართული ოპერის პრემიერას ამზადებს - გიორგი ჩლაიძის „დარისპანის გასაჭირი“
- +

17 იანვარი. 2019. 14:50

 

 

 

ქუთაისის მელიტონ ბალანჩივაძის სახელობის ოპერისა და ბალეტის პროფესიული სახელმწიფო თეატრი (სამხატვრო ხელმძღვანელი - ირინე ლომინაძე) 50-ე თეატრალური სეზონის მორიგი პრემიერისთვის ემზადება - 25 იანვარს, 19 საათზე, წარმოდგენილი იქნება ცნობილი ქართველი კომპოზიტორის გიორგი ჩლაიძის ოპერა „დარისპანის გასაჭირი“ (ახალი ვერსია; ვარლამ ნიკოლაძის ლიბრეტო, დავით კლდიაშვილის ამავე სახელწოდების პიესის მიხედვით). სპექტაკლი მოამზადა დამდგმელმა შემოქმედებითმა ჯგუფმა დირიჟორ ლევან ჯაგაევის, რეჟისორ მაია გაჩეჩილაძის, მხატვარ თეო კუხიანიძის, ქორმაისტერ ირინე ლომინაძის  შემადგენლობით.

 

საგულისხმოა, რომ გიორგი ჩლაიძის ოპერის „დარისპანის გასაჭირის“ მსოფლიო პრემიერა 1977 წელს სწორედ ქუთაისის ოპერის თეატრში შედგა და ეს იყო თეატრის პირველი საკუთარი ქმნილება, რომელიც „ქუთაისის საოპერო სცენაზე დაიბადა კომპოზიტორისა და თეატრის შემოქმედებითი თანამეგობრობის შედეგად“.

 

ოპერის ახალი ვერსია, რომელიც ამჯერად იქნება წარმოდგენილი, გიორგი ჩლაიძემ შექმნა 2010 წელს. ოპერის პარტიტურა მნიშვნელოვნად გადახალისდა, დაემატა ქალთა გუნდი, დარისპანის ორი არიისთვის – „დარისპანის ჩივილი“ და „დარისპანის მოთქმა“ დაიწერა ახალი მუსიკალური მასალა, მიმიკური პერსონაჟი ოსიკო კომპოზიტორმა გაიაზრა ტენორად, რომელსაც საკუთარი სრულფასოვანი სასიმღერო პარტია აქვს.

 

საპრემიერო წარმოდგენაში მონაწილეობას მიიღებს ქუთაისის ოპერის თეატრის გუნდი, ორკესტრი, მთავარ პარტიებს შეასრულებენ თეატრის სოლისტები: ლაშა თითბერიძე (დარისპანი), ნუცა ზაქაიძე  (მართა), ნათია სტეფანიშვილი  (პელაგია), ემილ ჩარგაზია (ონისიმე), მარიეტა მაჩალაძე (კაროჟნა), სოფიო ბერიშვილი (ნატალია), მიხეილ ქებაძე (ოსიკო).

 

„დარისპანის გასაჭირის“ დადგმა საქართველოს განათლების, მეცნიერების, კულტურისა და სპორტის სამინისტროს ფინანსური მხარდაჭერით განხორციელდა.

 

 

 

 

right_banner
არქივი
right_banner